Axtarılır
Zəhmət olmasa bir neçə saniyə gözləyin ...
Zəhmət olmasa bir neçə saniyə gözləyin ...
00:50 – Bakı–Bratislava reysinin enişi.
01:30 – Bratislava hava limanında qrupun qarşılanması.
02:30 – Otelə transfer.
03:00 – Otelə yerləşmə.
Bu gün sizdən çox şey tələb olunmur. Rahat uçuşdan sonra Bratislavaya enəcək, otelə qısa transfer edəcək və dincəlmək üçün otaqlarınıza yerləşəcəksiniz.
Qarşıda sizi Avropanın ən gözəl şəhərləri ilə dolu unudulmaz bir səyahət gözləyir. Sabahdan etibarən isə bu möhtəşəm macəra bütün gözəlliyi ilə başlayacaq.
09:00 – Oteldə səhər yeməyi.
11:00 – Avtobusla Praqaya yola düşmə (təxminən 400 km).
17:00 – Praqada piyada şəhər turu.
19:00 – Sərbəst vaxt.
22:00 – Otelə yerləşmə.
Praqa ilə ilk tanışlıq üçün günün ən gözəl saatları sizi gözləyir. Axşamüstü şəhərin istisi azalır, turistlərin sayı seyrəlir və Köhnə Şəhərin küçələri, tarixi binaları qızılı işıqlar altında tamam fərqli gözəllik qazanır.
Şəhər turu zamanı dünyaca məşhur Astronomik Saatı, Karl körpüsünü, tarixi meydanları və Praqanın sirli küçələrini kəşf edəcəksiniz. Burada sizi qeyri-adi memarlıq nümunələri, maraqlı heykəllər və şəhərin əsrlər boyu qorunub saxlanılan ab-havası valeh edəcək.
Sərbəst vaxtınızda isə Çexiya mətbəxinin ləzzətlərini dada, məşhur çex pivəsini sınaya və Praqanın romantik küçələrində gəzərək bu nağıl şəhərinin unudulmaz atmosferini hiss edə bilərsiniz.
08:00 – Oteldə səhər yeməyi.
09:00 – Avtobusla Nürnberqə yola düşmə (təxminən 300 km).
14:00 – Nürnberqdə piyada şəhər turu.
16:00 – Sərbəst vaxt.
+ Əlavə ekskursiya: Rotenburq ob der Tauber.
19:00 – Avtobusla Ştutqart yaxınlığındakı tranzit otelinə yola düşmə (təxminən 220 km).
22:00 – Otelə yerləşmə.
Nürnberq Almaniyanın tarix, mədəniyyət və ənənələrini özündə yaşadan ən maraqlı şəhərlərdən biridir. Orta əsrlərə aid küçələri, qədim qala divarları və tarixi meydanları ilə şəhər sizi keçmişə səyahətə aparacaq.
Şəhər turu zamanı Nürnberqin zəngin tarixi, məşhur memarlıq abidələri və şəhərlə bağlı maraqlı əfsanələrlə tanış olacaqsınız. Sərbəst vaxtınızda isə yerli kafelərdə məşhur Nürnberq kolbasalarını, ənənəvi Lebkuchen (zəncəfilli şirniyyat) və qədim reseptlə hazırlanan yerli pivəni dadmaq imkanınız olacaq.
Arzu edən qonaqlar üçün Almaniyanın ən romantik və ən yaxşı qorunub saxlanılmış orta əsr şəhərlərindən biri olan Rotenburq ob der Tauber şəhərinə əlavə ekskursiya təşkil olunur.
Dar daş küçələri, rəngarəng yarımtaxta evləri, qədim qala divarları və nağıl ab-havası ilə tanınan bu şəhər sanki sizi əsrlər öncəsinə aparacaq və Almaniyanın ən fotogenik məkanlarından biri ilə tanış olmaq imkanı yaradacaq.
08:00 – Oteldə səhər yeməyi.
09:00 – Avtobusla Strasburqa yola düşmə (təxminən 150 km).
12:00 – Strasburqda piyada şəhər turu.
14:00 – Sərbəst vaxt.
+ Əlavə ekskursiya: Kolmar.
19:00 – Avtobusla Müluz şəhərində yerləşən tranzit otelinə yola düşmə (təxminən 115 km).
21:00 – Otelə yerləşmə.
Strasburq Fransa və Almaniya mədəniyyətinin ahəngdar şəkildə qovuşduğu unikal şəhərlərdən biridir. Tarixi mərkəzi, füsunkar yarımtaxta evləri, dar küçələri və möhtəşəm kafedralı ilə bu şəhər ilk baxışdan hər kəsi valeh edir.
Şəhər turu zamanı Strasburqun əsrlərlə formalaşmış tarixi, zəngin memarlığı və maraqlı əfsanələri ilə tanış olacaqsınız. Məhz burada kitab çapının banilərindən olan İohann Qutenberq fəaliyyət göstərmiş, Fransanın məşhur "Marselyeza" himni yazılmış və dünyada ilk dəfə bütöv bir tarixi məhəllə UNESCO-nun Dünya İrs Siyahısına daxil edilmişdir.
Arzu edən qonaqlar üçün Elzas bölgəsinin ən romantik şəhərlərindən biri olan Kolmara əlavə ekskursiya təşkil olunur.
Nağıl ab-havasını xatırladan rəngarəng yarımtaxta evləri, "Kiçik Venesiya" adlanan kanalları və güllərlə bəzədilmiş körpüləri ilə Kolmar dünyanın ən fotogenik şəhərlərindən hesab olunur. Deyilənə görə, bu şəhərin mənzərələri məşhur yapon rejissoru Hayao Miyazakini "Hərəkət edən qəsr" animasiya filmini yaratmağa ilhamlandırıb.
Kolmar həm də Elzas şərablarının paytaxtıdır. Burada arzu edənlər məşhur Riesling və Gewürztraminer şərablarını dada bilərlər. Şəhərin girişində qonaqları qarşılayan 12 metrlik Azadlıq Heykəli isə Kolmarın maraqlı simvollarından biridir.
08:00 – Oteldə səhər yeməyi.
09:00 – Avtobusla Bazelə yola düşmə (təxminən 80 km).
10:00 – Bazeldə piyada şəhər turu.
12:00 – Sərbəst vaxt.
+ Əlavə ekskursiya: Lütsern (təxminən 100 km).
19:00 – Avtobusla Lindau yaxınlığında yerləşən tranzit otelinə yola düşmə (təxminən 220 km).
22:00 – Otelə yerləşmə.
Bazel İsveçrənin mədəniyyət paytaxtı hesab olunur. Şəhər zəngin muzeyləri, tarixi memarlığı, festivalları və incəsənət tədbirləri ilə məşhurdur. Burada qədim küçələr və müasir şəhər həyatı bir-birini mükəmməl şəkildə tamamlayır.
Şəhər turu zamanı Bazelin tarixi mərkəzi, qədim binaları və Reyn çayı sahilindəki gözəl mənzərələrlə tanış olacaqsınız. Şəhərin rəmzi sayılan əfsanəvi Vasilisk haqqında maraqlı hekayələr də bu gəzintinin unudulmaz hissəsinə çevriləcək. Sərbəst vaxtınızda isə Reyn sahilində gəzə, rahat kafelərdə dincələ və Bazelin özünəməxsus ab-havasını hiss edə bilərsiniz.
Arzu edən qonaqlar üçün İsveçrənin ən gözəl şəhərlərindən biri olan Lütsernə əlavə ekskursiya təşkil olunur.
Alp dağlarının qoynunda yerləşən bu şəhər ecazkar təbiəti və tarixi abidələri ilə tanınır. Burada Avropanın ən qədim taxta örtülü körpüsü olan Kapellbrücke, qayaya həkk olunmuş məşhur Şir abidəsi, möhtəşəm Pilatus dağı və göl sahilinin füsunkar mənzərələri sizi valeh edəcək.
Lütsern həm də mühəndislik möcüzələri ilə məşhurdur. Dünyanın ən dik dişli dəmir yolu və uzun illərdir fəaliyyət göstərən unikal hidrotexniki qurğular bu şəhəri İsveçrənin ən maraqlı istiqamətlərindən birinə çevirir. Lütsern sizi həm təbiəti, həm də tarixi ilə unudulmaz təəssüratlarla qarşılayacaq.
08:00 – Oteldə səhər yeməyi.
09:00 – Avtobusla Münhenə yola düşmə (təxminən 180 km).
12:00 – Münhendə piyada şəhər turu.
14:00 – Sərbəst vaxt.
17:00 – Avtobusla Çeske-Budeyovitse şəhərində yerləşən tranzit otelinə yola düşmə (təxminən 306 km).
22:00 – Otelə yerləşmə.
Münhen Almaniyanın ən rəngarəng və qonaqpərvər şəhərlərindən biridir. Tarixi memarlığı, geniş meydanları və Bavariya mədəniyyəti bu şəhərə özünəməxsus ab-hava bəxş edir.
Şəhər turu zamanı məşhur Frauenkirxe kafedralını, Marienplats meydanını və Münhenin digər simvolik məkanlarını görəcək, şəhərin tarixi və maraqlı əfsanələri ilə tanış olacaqsınız. Bələdçimiz sizə kafedraldakı məşhur "şeytan izi", şəhərin gerbindəki rahib fiquru və Münhenin ən məşhur muzeyləri haqqında maraqlı məlumatlar təqdim edəcək.
Sərbəst vaxtınızda isə İngilis bağında Aysbax çayında ilboyu sörfinqlə məşğul olan idmançıları izləyə, Viktualienmarkt bazarında Bavariya mətbəxinin məşhur ağ kolbasalarını və brezellərini dada və ya dünyanın ən məşhur pivə restoranlarından biri olan Hofbräuhausun atmosferini hiss edə bilərsiniz.
08:00 – Oteldə səhər yeməyi.
09:00 – Avtobusla Vyanaya yola düşmə (təxminən 200 km).
12:00 – Vyanada piyada şəhər turu.
14:00 – Sərbəst vaxt.
+ Əlavə: Şönbrunn sarayına transfer.
20:00 – Avtobusla Bratislavaya (Slovakiya, təxminən 70 km) yola düşmə.
21:00 – Otelə yerləşmə.
Vyana musiqinin, incəsənətin və imperiya tarixinin şəhəridir. Burada Motsartın, Bethovenin, Freydin və Qustav Klimtin izləri hər addımda hiss olunur. Möhtəşəm memarlıq, geniş bulvarlar, tarixi meydanlar və məşhur Vyana kafeləri şəhərə xüsusi zəriflik bəxş edir.
Şəhər turu zamanı Hofburq sarayı, Müqəddəs Stefan kafedralı, Dövlət Opera Teatrı və Vyananın digər məşhur görməli yerləri ilə tanış olacaq, sərbəst vaxtınızda isə şəhərin unikal atmosferini daha yaxından hiss etmək imkanı əldə edəcəksiniz.
Arzu edən qonaqlar üçün Habsburqların yay iqamətgahı olan möhtəşəm Şönbrunn sarayına transfer təşkil olunur.
1441 otaqdan ibarət bu möhtəşəm saray Avropanın ən möhtəşəm imperiya komplekslərindən biridir. Dünyanın ən qədim zooparkı, geniş parkı, labirintləri və zəngin tarixi ilə Şönbrunn hər il milyonlarla turistin ziyarət etdiyi məkanlardan biridir.
Burada altı yaşlı Motsart ilk saray konsertini vermiş, Napoleon bir müddət yaşamış, ABŞ Prezidenti Kennedi ilə SSRİ rəhbəri Xruşşovun tarixi görüşü keçirilmişdir. Saray ziyarətindən sonra isə Qloriyetta terrasına qalxaraq həm sarayın, həm də Vyananın möhtəşəm panoramasını seyr edə bilərsiniz.
09:00 – Oteldə səhər yeməyi.
11:00 – Bratislava hava limanına transfer.
13:30 – Bratislava – Bakı reysi.
Beləliklə, səyahətimizin son gününə çatdıq. Arxada altı ölkə, unudulmaz şəhərlər, maraqlı tarixlər, yüzlərlə gözəl foto və ömür boyu xatırlanacaq xatirələr qalır.
Ümid edirik ki, bu tur sizə yeni dostluqlar, xoş təəssüratlar və Avropanın ən gözəl guşələrini kəşf etmək imkanı qazandırdı. İndi isə ən çətin hissə – aldığınız hədiyyələri və yerli ləzzətləri evə çatdırmaq, onları yolda dadmadan saxlamaq olacaq.
Sizə rahat uçuş, xoş yol və yeni səyahətlərdə yenidən görüşmək ümidi ilə!
Əlavə məlumatlar:
- Tur programına uyğun olaraq Slovakiya vizasına müraciyyət edilməlidir;
- Uşaqlar üçün yaş həddi: 4–11.99 yaş. 4 yaşdan kiçik uşaqlar tura qəbul edilmir.
- Uşaqlar üçün qiymər DBL+CHLD otaq tipində mümkündür;
- Sərbəst vaxtlarda avtobus müşayiəti təmin edilmir;
- Turoperator fövqəladə hallarda ekskursiyaların sırasını dəyişdirə və ya ekvivalentləri ilə əvəz edə bilər;
- City tax, checkpoint və əlavə ekskursiyaların ödənişi turistlər tərəfindən tur zamanı yalnız nağd şəkildə avro ilə həyata keçirilir.
- 1/2 TWIN rezervasiyası check-in tarixinə 14 gündən az müddət qaldıqda, rezervasiyanın təsdiqlənmə imkanı öncədən satış meneceri ilə mütləq dəqiqləşdirilməlidir.
- Avtobusda oturacaq yerlərinin sxemi təxmini xarakter daşıyır. Oturacaq yerləri avtobusun model və modifikasiyasından asılı olaraq dəyişə bilər və əvvəlcədən zəmanət verilmir.
Ödəmə şərtləri:
- 30 EUR – tur dəyərinin zəmanətli hissəsi rezervasiya tarixindən etibarən 3 gün ərzində ödənilməlidir. Zəmanətli hissənin ödənilməməsi rezervasiyanın xəbərdarlıq edilmədən avtomatik ləğvi ilə nəticələnəcək.
- Turun dəyərinin 100%-i turun başlamasına ən geci 14 gün qalmış ödənilməlidir.
Ləğv şərtləri:
- Turun ləğvi zamanı, turun başlamasına qədər olan vaxtdan asılı olmayaraq, turun ləğv edilməsinin səbəbindən (vizadan imtina, aviabiletlərin olmaması, xəstəlik və s.) asılı olmayaraq, turun zəmanətli hissəsi (adam başına 30 EUR) geri qaytarılmır.
- Turun başlamasına 14 gündən az qalmış tur ləğv edilərsə, cərimə turun dəyərinin 100%-ni təşkil edir.